د اسیکودا په سیستم د هرات اوسپيني پټلۍ تم ځایونو سمبالښت
د افغانستان اوسپني پټلۍ خپلواکي ادارې د ماليې وزارت په تخنیکي مرسته د هرات ولایت د اوسپني پټلۍ په څو تم ځایونو کې د «اسیکودا، ASYCUDA» سیستم نصب او فعال کړی دی.
د خواف ـ هرات د اوسپني پټلۍ په بهیر کې د روزنګ او تورغندي د اوسپني پټلۍ تم ځای، د اسیکودا په سیستم سمبال شوی او د هرات ولایت د اوسپني پټلۍ یوشمېر کارکوونکو ته له دې سیستم څخه د سمې ګټې اخیستنې تګلاره ښودل شوې ده.
د هرات په اوسپني پټلۍ کې د اسیکودا له سیستم څخه ګټه پورته کول مرسته کوي څو د هغو سوداګریزو مالونو د واګونونو او ځانګړتیاو شمېر چې له دې لارې تېرېږي، پروخت وپېژندل شي او معلومات يې له مرکزي ادارې او نورو اړوندو ادارو سره شریک شي.
له بلې خوا، دا سیستم د اوسپني پټلۍ د ګټې اخیستنې په چارو کې د ډېر چټکتیا، آسانتیاو، روڼتیا، څارنې او کره توب د رامنځټه کېدو لامل شوی، د اوسپني پټلۍ په تم ځایونو کې ګمرکي خدماتو بهیر آسانه کوي او د عوایدو له تېښتې مخنیوی کوي.
د یادونې وړ ده چې د تورغندي اوسپني پټلۍ د هېواد له مهمو ټرانسپورټي برخو څخه شمېرل کېږي چې هره ورځ زرګونه ټنه سوداګریز مالونه د اورګاډي له لارې لېږدول کېږي او ټاکل شوې په نېږدې راتلونکې کې د اورزنګ تم ځای هم ګټې اخیستنې ته وسپارل شي.
دا په داسې حال کې ده چې تردې وړاندې د حیرتان ـ مزارشریف د اوسپني پټلۍ څو تم ځایونه په دې سیستم سمبال شوي و او اوس مهال تر ګټې اخیستنې لاندې نیول شوي دي.
