د اوسپنې پټلۍ ادارې او د مالیې وزارت تر منځ د همکاریو هوکړه لیک لاسلیک شو
د افغانستان اوسپنې پټلۍ ادارې عملیاتي مرستیال، ښاغلي انجنیر میرویس غفوری، د چهار شنبې پر ورځ (د غبرګولي ۲۶مه) د مالیې وزارت د ګمرکونو او عوایدو مرستیال، ښاغلي عالم شاه ابراهیمي سره، د ګمرکونو او عوایدو په معینیت کې د همکاریو هوکړه لیک لاسلیک کړ.
د دې هوکړه لیک موخه د مالیې وزارت او د افغانستان د اوسپنې پټلۍ ادارې په اجرااتو کې یووالي او همغږۍ، د رېل پټلۍ له لارې د سوداګرۍ او ترانزیټي اقلامو د انتقالاتو حجم په تثبیت کې روڼتیا رامنځته کول، د لا زیاتې روڼتیا تامین، د ملي عوایدو لوړول او په کاري چارو کې غوره همغږي ده.
همداشان په دې هوکړه لیک کې د افغانستان اوسپنې پټلۍ ادارې او د مالیې وزارت مکلفیتونه او صلاحیتونه واضح شوي دي او دواړو ادارو یې پر بشپړ پلي کېدو ټینګار وکړه.
