د خواف-هرات اوسپنې پټلۍ مسير د پاک کارۍ چارې ترسره شوې
د روزنک اوسپنې پټلۍ آمریت د حفظ او مراقبت د عملياتي ټيم په هڅو د خواف-هرات د اوسپنې پټلۍ د ۶۲ کيلومتره مسير د ۵۰۰ طول متر په امتداد د پاک کارۍ چارې ترسره شوې، چې شاوخوا ۳زره متره مکعبه واوره له ساحې څخه پاکه شوه.
د ياد مسير د پاک کارۍ چارې د روزنک اوسپنې پټلۍ آمریت د حفظ او مراقبت د ۲۰ کسیز ټيم او يو عراده ریلي شاول په مټ شنبه د حوت په ۱۲مه د ۳۹_۴۰ او ۴۰_۴۱ کيلومتره ترمنځ ترسره شوې.
د روزنک اوسپنې پټلۍ آمریت د حفظ او مراقبت عملياتي ټيم هڅه کوي، چې د پاک کارۍ چارې ماښام تر ۷ بجو پورې تر غوريان سټيشن پورې نږدې کړي.
دا په داسې حال کې ده، چې د روانې حوت مياشتي له ۷مې نېټې څخه د دوامداره واورې د اورښت او د باد د سرعت له امله ددې مسير د حفظ او مراقبت، ټرانسپورټ او د تخليې او بارګيرۍ چارې له ځنډ او خنډ سره مخ شوي وې.
