د مزارشریف-هرات د اوسپنې پټلۍ د پروژې پلي کول
د افغانستان د اسلامي جمهوريت او د ازبکستان د جمهوريت ترمنځ د اقتصادي همکاريو غونډه د روان کال د وري مياشتې په ۱۱ نېټه د ازبکستان د جمهوريت د لوړ پوړي اقتصادي پلاوي په ګډون په کابل کې ترسره شوه. افغان اقتصادي پلاوی د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي تر مشرتابه لاندې او د دوست هیواد ازبکستان لوړ پوړی اقتصادي پلاوی د یاد هیواد د بهرنۍ پانګونې او سوداګرۍ وزارت مرستیال ښاغلي بدرالدین عابدوف تر مشرۍ لاندې په دې غونډه کې ګډون درلود.
د تېرو کلونو په بهير کې د افغانستان او ازبکستان دوه اړخيزو اړيکو د اقتصاد په برخه کې د پام وړ پرمختګ کړی او دواړه هېوادونه د دې اړيکو د لا پراختيا غوښتونکي دي. د دواړو هېوادونو د همکاريو د ترسره شوو مذاکراتو په جريان کې د اوسپنې پټلۍ د پروژو، د افغانستان په شمالي سيمو کې د نفت او ګازو د څاګانو په کېندنو، د برښنا او انرژي توليد او توزيع، سوداګرۍ، ټرانزيټ او د سوداګرۍ او صنايعو د خونو له لارې په دوه اړخيزو همکاريو ټينګار وشو.
د پورتنۍ يادې شوې غونډې په بهير کې د دواړو هېوادونو د همکاريو د پراختيا څخه سربېره د اوسپنۍ پټلۍ په برخه کې د هرات – مزارشريف د اوسپنۍ پټلۍ په پروژې خبرې وشوې او د افغانستان د اوسپنۍ پټلۍ ادارې د پروژې د تخنيکي – اقتصادي مطالعاتو د بشپړېدو خبر ورکړ او څرګنده يې کړه چې د پروژې د مالي تمويل لپاره د نړيوال کانسورتيم د رامنځته کولو په چوکاټ کار دوام لري.
د مزارشریف – هرات د اوسپنۍ پټلۍ پروژه په ۶۵۷ کيلومتره اوږدوالي سره د بلخ-جوزجان-فاریاب-بادغیس-هرات له ولايتونو څخه تېرېږي چې د اوسپنۍ پټلۍ د کريډور برخه ده او د افغانستان له لارې د منځنۍ آسيا هېوادونه د سويلي آسيا سره نښلوي. دا پروژه د افغانستان د اسلامي جمهوريت او ازبکستان د جمهوريت لپاره د اقتصادي اهميت سربېره سيمې ته ستراتيژيک اهميت لرونکې ده.
