د ۱۴۰۲ مالي کال پلان ارزونه؛ هغه پروژې په پلان کې ونیول شوې چې لومړیتوب یې ډیر دی!
نن دوشنبه د افغانستان د اوسپنې پټلۍ ادارې د عمومي رئیس الحاج ملا بخت الرحمن شرافت په مشري د ادارې د غونډو په تالار کې د ادارې د معاونینو، مشاورینو، رئیسانو او آمرینو په گډون د ادارې د ۱۴۰۲ مالي کال د پلان ارزونه وشوه.
د غونډې په پیل کې د ادارې عمومي رئیس ښاغلي شرافت وویل: داسې پلان باید ترتیب شي چې د شته امکاناتو او وخت په نظر کې نیولو سره د تطبیق وړ وي.
د غونډې په دوام د پلان په بېلابېلو برخو مفصل بحثونه وشول او د اړوند ریاستونو او آمریتونو مسلکي نظرونه په کې واخیستل شول.
دغه غونډه کې د ۱۴۰۲ مالي کال په پلان کې د حیرتان اداري تعمیر جوړېدلو، د آقینې ستیشن ته پراختیا ورکولو، د حیرتان – مزارشریف ستیشنونو توسعه ورکولو، تورغونډۍ بندر کې د کانال کېندلو ترڅنگ یو شمېر مهمې پروژې چې لومړیتوب یې ډیر او تطبیق یې په شته امکاناتو او روان مالي کال کې ممکن دی، شاملې شوې.
دغه غونډه چې د ادارې د مدرس له لوري د قرانکریم د مبارکو ایتونو په تلاوت پیل شوه، د خیر دعاء په کولو سره پای ته ورسېده.
د نشراتو آمریت
۸ جوزا ۱۴۰۲ هـ.ش.
