د اوسپنې پټلۍ مسلکي انسټیټیوټ د هرات رياست کارکوونکو ته د ظرفيت لوړولو په موخه لس ورځنی روزنيز ورکشاپ تطبيق کوي
د افغانستان د اوسپنې پټلۍ مسلکي انسټیټیوټ چي د افغانستان د اوسپنې پټلۍ ادارې تر چتر لاندې فعاليت کوي، په لومړۍ مرحله کې د هرات ولايت د اوسپنې پټلۍ رياست ۱۶ تنو مسلکي کارکوونکو ته د ظرفيت لوړولو په موخه لس ورځنۍ روزنه ورکوي.
ياد انسټیټیوټ په لومړي قدم کې د اوسپنې پټلۍ د ساتنې او څارنې (روسازي خط) په برخه کې د هرات ولايت تورغندۍ، روزنک او غوریان سټيشنونو د اوسپنې پټلۍ د ساتنې او څارنې مسلکي کارکوونکو ته د ظرفيت لوړولو په موخه لس ورځنۍ لنډمهاله روزنیزه دوره ترتيب کړې، چي تطبیق چارې يې له ۱۴۰۲/۱۱/۱۵ څخه پيل او تر ۱۴۰۲/۱۱/۲۵ ھ.ش. پورې دوام مومي.
په دغه روزنيزه دوره کې د ذکر شوو سټيشنونو کارکوونکو ته په عملي او نظري بڼه د اوسپنې پټلۍ د ساتنې او څارنې (روسازي خط) په برخه کې مسلکي پوهه او روزنه ورکول کېږي.
دا په داسې حال کې ده، چي د اوسپنې پټلۍ مسلکي انسټیټیوټ اړتيا ته په کتو د افغانستان د اوسپنې پټلۍ ادارې اړوند کارکوونکو ته په بېلابېلو برخو کې د ظرفيت لوړولو په موخه دا ډول لنډمهاله او منځمهاله روزنيز پروګرامونه په مرکز او ولایاتو کې په عملي او نظري بڼه ترتیب او تطبيق کوي.
