په تېرو ۱۱ مياشتو کې د حيرتان بندر له لارې ۲.۸ ميليونه ټنه انتقالات ترسره شوي دي
د بلخ ولايت د اوسپنې پټلۍ رئیس وايي، چې د روان ۱۴۰۲ ه.ش. کال په ۱۱ مياشتو کې د حيرتان بندر له لارې شاوخوا ۲.۸ ميليونه ټنه انتقالات ترسره شوي دي.
ښاغلي مولوي محمد شفیق محمود په دې اړه زياتوي، چې اوسمهال د حيرتان بندر له لارې په اوسط ډول روزانه ۱۰ زره ټنه انتقالات ترسره کيږي، چې پکې واردات، صادرات او ټرانزیټ شامل دي.
د نوموړي په وينا، په تېر ۱۴۰۱ ه.ش. پوره کال کې حيرتان بندر شاوخوا ۳.۴ ميليونه ټنه انتقالات لرل.
د هغه په خبره، د حيرتان مسير په بشپړ ترمیم او فعاليت سره به تجارانو ته لازياتې آسانتیاوې برابرې شي، ترڅو دوی وکولای شي ددې مسير له لارې په پوره اطمینان او مصونيت سره خپل تجارتي توکي صادر او وارد کړي.
دا په داسې حال کې ده، چې د حيرتان-مزارشريف د ۷۵ کيلومتره اوسپنې پټلۍ مسير پروژې د بيارغونې چارې تېره اوونۍ د افغانستان د اوسپنې پټلۍ ادارې په مالي لګښت او ازبکستان د اوسپنې پټلۍ ادارې په همکارۍ پيل شوې، چې د ۳ مياشتو په موده کې به د ياد مسير ریلي او غير ریلي برخې په بشپړ ډول ترمیم کيږي.
