د افغانستان اوسپنې پټلۍ ادارې عمومي رییس په افغانستان کې د قزاقستان له سفیر سره وکتل
د افغانستان اوسپنې پټلۍ عمومي رییس ښاغلي ولي خان شبګیر په خپل کاري دفتر کې د افغانستان لپاره د قزاقستان هیواد سفیر، له ښاغلي علیم خان یاسین گیلدیف سره ولیدل، په همدې لیدنه کې د اوسپنې پټلې ادارې تخنیکي او عملیاتي مرستیالانو او د INKON KZ قزاقستاني شرکت مرستیال هم ګډون درلود.
په دې کتنه کې، د خواف – هرات اوسپنې پټلۍ د څلورمې قطعې د لومړي فاز د استملاکي او امنیتي ستونزو ارزونه وشوه او دواړو خواو پر شته ستونزو د حل او د چارو د چټکتیا لپاره خبرې اترې وکړې او په اړوند یې اړینې پریکړې وشوې.
د غونډې په بله برخه کې، د دواړو هیوادونو د اوسپنې پټلۍ ادارو د اړیکو د لا پراختیا ، د قزاقستان د اوسپنې پټلۍ ادارې پر دوامداره همکارۍ او قزاقستان د لورې د افغانستان د اوسپنې پټلۍ ادارې د ظرفیت لوړونې په اړه بحث وشو.
همدارنګه، هوکړه وشوه چې په روان کال کې به ۱۰ تنه د اوسپنې پټلۍ په انجنیري برخه کې د لیسانس زده کړو لپاره قزاقستان هېواد ته واستول شي.
د یادونې وړ ده، چې د خواف – هرات اوسپنې پټلۍ د لومړي فاز څلورمې قطعې د جوړلو چارې له INKON KZ قزاقستاني شرکت سره دولت په دولت شکل سره تړون شوي؛ چې دا مهال یې چارې ۴۰ سلنه بشپړ شوي دي.
