د افغانستان د اوسپنې پټلۍ ادارې نوبتي غونډه دايره شوه
د افغانستان د اوسپنې پټلۍ ادارې دوه ورځنۍ نوبتي غونډه د ثور په ۵مه او ۸مه د ادارې د عمومي رئيس الحاج ملا بخت الرحمن شرافت په مشرۍ ترسره شوه.
غونډه چې د قران الکريم په مبارکو ايتونو پيل شوه، پکې د عمومي رئيس الحاج ملا بخت الرحمن شرافت ترڅنګ، مالي او اداري مرستيال ښاغلي سيد محمد نعيم محمدي، تخنيکي مرستيال ديپلوم انجنير ښاغلي عبدالباري صديقي، ارشد سلاکار، مرکزي او ولايتي رئيسانو او آمرينو په حضوري او انلاين بڼه ګډون درلود.
په پیل کې عمومي رئيس ښاغلي شرافت ګډونوالو ته د خپلې وينا پرمهال وويل: «موږ او تاسو ټول د خپلو مسوولیتونو په وخت سرته رسولو او غوره طريقه ترسره کولو مکلف يو.»
نوموړي زياته کړه، چې ټول باید لومړی له وخت څخه منظمه ګټه واخلو او يو منظم کاري پلان ولرو، ترڅو ورځنۍ چارې مو هم په ښه ډول په مخ ولاړې شي.
ورپسې د اجنډا سره سم په غونډه کې په يوشمېر مهمو مسایلو مفصل بحثونه ترسره او په اړه يې لازم تصميمونه ونیول شول.
په ياده اداري غونډه کې د ۱۴۰۳ ه.ش. مالي کال پلان، د تورغونډۍ-هرات پروژې د مسير انتخاب، ډيټيل سروې او ډيزاين، د کندهار-سپين بولدک پروژې د مسير او ګېج انتخاب، ډيټيل سروې او ډيزاين، د حيرتان اداري تعمير لپاره د احاطوي دېوال، د شمشتېغ اداري تعمير تخنيکي ډيزاين او يو لړ نور موضوعات تر بحث لاندې ونيول شول.
په غونډه کې د پورتنيو او يو شمېر نورو مهمو موضوعاتو په اړه تر مفصلو بحثونو وروسته د رهبرۍ لخوا اړوند مرجع ګانو ته لازم هدايات ورکړل شول او وخت ته په پاملرنې سره يې د تطبيق غوښتنه وشوه.
غونډه د خير په دعا لوستلو سره پای ته ورسېده.
