په تیره میاشت کې د اوسپنې پټلۍ له لارې تر 7 زره ټنه ډیر توکې له هیواده بهر صادر شو
د حیرتان- مزارشریف، آقینې او تورغندۍ اوسپنې پټلۍ له لارې په تیر میاشت کې 7 زره او 27 ټنه ډېر کرنیز او سوداګریز توکې له هیواد بهر ته صادر شوي.
دا توکې چې د مزارشریف- حیرتان، آقینې او تورغندی اوسپنې پټلۍ له تمځایونو څخه بار شوی وو، اوزبیکستان، روسیه او قزاقستان هېوادنو ته استول شوي.
په صادر شویو توکو کې کرنیز محصولات لکه حبوبات، وچې میوې او تازه میوې شامل دي چې ډېری یې مالته دي.
دا په داسې مهال کې ده چې څو ورځې مخکې ده لومړی ځل لپاره د آقینې – اندخوی اوسپنې پټلۍ له لارې د توکو لېږد پیل شو او د افغانستان د کورنیو تولیداتو یوه محموله له دې لاره بهر ته واستول شوه.
