د مرکزي آسيا د اقتصادي او سيمه ئيزو همکاريو سازمان (CAREC) د اوسپنې پټلۍ د تخنيکي ډلې د څلورمې غونډې جوړېدل
د اوسپنې پټلۍ د تخنيکي ډلې څلورمه غونډه؛ د مرکزي آسيا د اقتصادي او سيمه ئيزو همکاريو سازمان د غړو هېوادونو د اوسپنې پټلۍ ادارو د لوړ رتبه پلاوو او همدارنګه د نړيوالو بنسټونو لکه نړيوال بانک(WB) ، آسيايي پراختيايي بانک(ADB) ، د اوسپنې پټلیو نړيوالې ټولنې (UIC)، د آسيا د زيربناوو د پانګونې بانک (AIIB) او نورو استازو په ګډون د ۱۳۹۸ کال د غوايي په ۲-۴ نېټه د ازبکستان د تاشکند په ښار کې ترسره شوه.
همدارنګه په نوموړې غونډه کې د افغانستان اوسپنې پټلۍ ادارې لوړ رتبه پلاوي ګډون درلود، چې د جوړېدو موخه يې د تخنيکي همکاريو (TA) د نوې پروژې په عملي کولو سره تر ۲۰۲۰ کال پورې د CAREC د ريلي لېږد را لېږد د پراختيا ستراتيژي په اړه بحث کول وو ترڅو له ۲۰۱۷ کال څخه تر ۲۰۳۰ پورې د ريلي لېږد را لېږد د پراختيا ستراتيژۍ ته چې مخکې چمتو شوې وه د تطبيق زمينه برابره کړي.
د غونډې په بهير کې پريکړه وشوه چې د CAREC غړو هېوادونو د اوسپنې پټليو ادارې به په رسمي توګه خپل فوکل پاينټونه د آسيايي پراختيايي بانک ته ورپېژني ترڅو د اوسپنې پټلۍ د هغو متخصصينو سره اړين معلومات شريک کړي چې په پام کې ده د آسيايي پراختيايي بانک لخوا د تخنيکي همکاريو د پروژې د عملي کولو لپاره وګمارل شي.
