د کندهار-سپين بولدک د ريل پټلۍ مسير ابتدايي سروې ترسره شوه
د افغانستان د اوسپنې پټلۍ ادارې تخنیکي پلاوي کندهار ولايت ته د خپل سفر پرمهال د کندهار-سپين بولدک ترمنځ د ريل پټلۍ پروژې ابتدايي سروې په برياليتوب ترسره کړه.
په دې تړاو د کندهار والي او آړوند ادارو له مسوولينو سره هم ناسته ترسره شوه، چې د ولايت مقام او آړونده ادارو د تخنيکي ټيمونو لخوا په ګډه ددې مسير ابتدايي سروې ترسره شوه.
دواړو لوريو په کندهار ولايت مقام کې د يوې کتنې پرمهال د کندهار-سپين بولدک ترمنځ د ريل پټلۍ پروژې د ابتدايي سروې په باب مفصل بحثونه وکړل.
د يادونې وړ ده، ددې مسير د ابتدايي سروې تر بشپړولو وروسته به په نږدې راتلونکي کې د ياد مسير ډيټيل سروې، ډيزاين او عملاً ساختماني چارو پيل کېدو ته لاره هواره شي.
د کندهار-سپین بولدک د اوسپنې پټلۍ پروژه ټولټال ۹۶ کيلومتره اوږدوالی لري، چې کندهار ښار له سپین بولدک ولسوالۍ سره نښلوي او بیا په چمن کې د پاکستان له اوسپنې پټلۍ شبکې سره نښلول کېږي.
