د آقینې- اندخوی اوسپنې پټلۍ جوړولو لپاره د اورګاډي د خامو موادو چمتو کول
د افغانستان د اوسپنې پټلۍ خپلواکې ادارې د آقینې- اندخوی اوسپنې پټلۍ پروژې لپاره د اړتیا وړ اوسپنې پټلۍ خام توکي چمتو کړي او دا مهال د اوسپنې پټلۍ ایښودلو پروسه روانه ده.
د ۳۰ کیلومتره آقینې- اندخوی اوسپنې پټلۍ د خامو موادو چمتو کولو تړون، د څه باندې ۹ میلیونو او ۲۳۷ زره امریکایې دالړ په ارزښت، تیر کال د افغانستان د اوسپنې پټلۍ خپلواکې ادارې او «هارس انترترد» هنګرۍ شرکت ترمنځ لاسلیک شو.
د تړون له مخې نوموړي شرکت د یادې پروژې ۱۸ قلمونو د اړتیا وړ د اورګاډي مواد لکه ریلونه، سلیپرونه، بندې او کنچی چې د اوسپنې پټلۍ جوړونې اساسي توکي بلل کیږي، چمتو کړي او د کار ځای ته لېږدول شوي.
د یادونې وړ ده چې د آقینې- اندخوی اوسپنې پټلۍ پروژې د جوړولو چارې رواني دي او تر دا مهاله د یادي پروژې د جوړولو چارې۶۰ سلنه څخه ډیري مخته تللي.
د قراردادي شرکت د ژمنې او پلان پر اساس ټاکل شوي د یادي پروژې کار د روان میلادي کال تر پایه بشپړ او ګټې اخیستنې ته وسپارل شي.
