د افغانستان د اوسپنې پټلۍ ادارې سرپرست رئیس د پولي تخنیک پوهنتون له استادانو سره وکتل
نن دوشنبه د جوزا ۱۶ مه د افغانستان د اوسپنې پټلۍ ادارې سرپرست رئیس ملا بخت الرحمن شرافت د پولي تخنیک پوهنتون د اوسپنې پټلۍ ډیپارټمنت له استادانو سره په خپل کاري دفتر کې وکتل.
دې ناسته کې چې مالي او اداري او تخنیکي معاونینو هم گډون درلود، ښاغلي شرافت د پوهنتون استادانو ته د ښه راغلاست ویلو ترڅنگ دوی ته وویل چې زموږ کدرونه کولای شي د هېواد په پرمختگ کې مؤثر رول ولوبوي.
ښاغلي شرافت زیاته کړه: "موږ هڅه کوو چې د اوسپنې پټلۍ ډیپارټمنت فارغانو ته کاري فرصتونه برابر کړو او په ټول توان زیار باسو چې د اوسپنې پټلۍ ټول کارونه افغاني کړو چې په دې سره به زیات شمېر هیوادوالو ته د کار زمینه برابره شي."
دې ناسته کې د اوسپنې پټلۍ ډیپارټمنټ رئیس د نورو استادانو په استازولي د ادارې له نوي رهبري مننه وکړه او له ادارې سره د هر راز مرستې تعهد یې وکړ. همداراز یې وویل چې زموږ نیکې مشورې او نظرونه تل تاسې سره دي او په گډه به کوښښ کوو چې د افغانستان د اوسپنې پټلۍ سیستم په نړیوالو نورمونو برابر کړو.
د مجلس په دوام کې ښاغلي شرافت استادانو ته د دوه اړخیزو همکاریو ډاډ ورکړ او دوی ته یې څرگنده کړه چې دوه اړخیزې همکاري د هېواد په پرمختگ او هېوادوالو په هوسایي کې مؤثر رول لري.
غونډه د دعایې په لوستلو پای ته ورسېده.
۱۶/۰۳/۱۴۰۱
د افغانستان د اوسپنې پټلۍ اداره
د مطبوعاتو آمریت
