اداري جلسه؛ موږ غواړو د اوسپنې پټلۍ پروژې افغاني کړو
پرون ۴شنبه (۰۱/۰۴/۱۴۰۱هـ.ش.) د افغانستان اوسپنې پټلۍ ادارې عمومي اداري جلسه د دې ادارې د غونډو په تالار کې د عمومي رئیس په مشري ترسره شوه.
دا ناسته چې مالي او اداري معاون او تخنيکي معاون، ریسانو، سلاکارانو او آمرینو پکې گډون درلود، د قرآنکریم د مبارکو آیتونو په تلاوت سره پیل شوه. همداراز د پکتیا، خوست او پکتیکا ولایتونو کې د زلزلې له امله شهیدانو او ټپیانو ته دعا وشوه.
وروسته د ادارې عمومي سرپرست رئیس ملا بخت الرحمن شرافت ایران ته د سفر راپور وړاندې کړ. ښاغلي شرافت وویل: موږ ایراني لوري ته وویل چې موږ هڅه کوو ورو – ورو د اوسپنې پټلۍ پروژې افغاني کړو، خپل کدرونه او تخنیکي پرسونل په دندو وگمارو.
ورپسې د ناستې د اجنډا په موضوعاتو مفصل بحثونه ترسره شوه. ناسته کې پرېکړه وشوه چې د آقینې – اندخوی د اوسپنې پټلۍ غیر ریلي تأسیساتو د ترمیم چارې به ژر تر ژره پیل شي.
همداراز پرېکړه وشوه چې د خواف – هرات د دریمې ټوټې د ترمیماتو چارې به هم ژر تر ژره پیل شي او هڅه کیږي چې یاده پټلۍ گټه اخیستنې ته وسپارل شي.
همدارنگه د نورو موضوعاتو په اړه لازم بحثونه وشول. غونډه د دعایې په لوستلو پای ته ورسېده.
د نشرآتو آمریت
۰۲/۰۴/۱۴۰۱هـ.ش.
