د افغانستان د اوسپنې پټلۍ ادارې عمومي رئيس د روسیې د ريل پټلۍ ادارې له مرستيال سره د ریل پټلۍ په پراختيا خبرې وکړې
د افغانستان د اوسپنې پټلۍ ادارې عمومي رئيس ښاغلي الحاج ملا بخت الرحمن شرافت او مل پلاوي د افغانستان د بهرنيو چارو په وزارت کې د روسیې د ريل پټلۍ ادارې له مرستيال ښاغلي اليا کازاکوف سره وکتل.
په دغه ناسته کې د افغانستان د اوسپنې پټلۍ ادارې د عمومي رئيس ترڅنګ تخنيکي مرستيال، ارشد سلاکار او د روسیې د ريل پټلۍ ادارې مرستيال ګډون درلود.
لومړی د افغانستان د اوسپنې پټلۍ ادارې عمومي رئيس ښاغلي شرافت د روسیې د ريل پټلۍ ادارې مرستيال ته د ښه راغلاست ويلو ترڅنګ ياده ناسته د دواړو هېوادونو ترمنځ د ریل پټلۍ په برخه کې يو انقلابي فرصت وباله.
نوموړي وويل: دواړه هېوادونه بايد د ریلي انتقالاتو لپاره يوه داسې اغېزمنه لاره غوره کړي، چې لګښتونه يې کم؛ لنډه او اسانه وي.
ورپسې د روسیې د ريل پټلۍ ادارې مرستيال له دې امله خوښي څرګنده کړه، چې تاسو د افغان ټرانس پروژې لپاره روسی ګېج انتخاب کړ.
ښاغلي اليا کازاکوف زياته کړه، دا چې په اتصالي برخه کې ريل پټلۍ د افغانستان لپاره تر ټولو زياته مهمه ده، فلهذا د روسیې د ريل پټلۍ اداره په هرات-بولدک او افغان ټرانس ریلي پروژو کې هم هر ډول همکارۍ ته چمتو ده.
نوموړي دغه راز ژمنه وکړه، چې د روسیې د ريل پټلۍ اداره به په ریلي برخه کې ګڼو افغان ځوانانو ته د مسلکي زده کړو زمينه هم برابره کړي.
