د ترکیې سفر؛ د افغان رېل پټلۍ ادارې مشر په کارابوک ښار کې د اوسپنې ویلي کولو کمپنۍ څخه لیدنه وکړه!
نن جمعه د رېل پټلۍ نړیوالې اتحادیې د منځني ختيځ څانګې (UIC RAME) د ٣١ مې غونډې له اجنډا سره سم، د افغان رېل پټلۍ ادارې مشر الحاج ملا بخت الرحمن شرافت او د بهرنیو اړیکو آمر عبدالمالک روحاني د "کاردمیر" اوسپنې ویلي کولو کمپنۍ څخه تخنیکي لیدنه وکړه.
له یادې کمپنۍ د لیدنې پرمهال له بیلابیلو تأسیساتو، تجهيزاتو او ماشینري څخه د نږدې لیدنې ترڅنګ د یادې کمپنۍ مشر ښاغلي سرکان اتامیر وویل چې دوی چمتو دي افغانستان سره د معدني موادو په مقابل کې افغانستان ته رېل تولید کړي او دوی دغه تجربه په نورو هیوادونو کې کړې ده او نتیجه یې مثبت ده.
د افغان رېل پټلۍ مشر ښاغلي شرافت د دوی وړاندیز ته په ځواب کې وویل چې په دغه وړاندیز به کابل کې بحث کیږي او د افغان حکومت د موافقې په صورت کې به مخ پر وړاندې ځو.
ياده دې وي چې کاردمیر کمپنۍ د سیمې په کچه د اوسپنې ویلي کولو مشهوره کمپنۍ ده، چې د رېل، د لوکوموتیو او درزین د ویلونو (بوژي) ترڅنګ د رېل پټلۍ اړوند بیلابیل تجهيزات توليدوي.
۱۲ جوزا ۱۴٠٢هـ.ش
