چينايي پانګوال: په افغانستان کې د اوسپنې پټلۍ په برخه کې پانګونه زموږ لومړيتوب دی
د هرات د اوسپنې پټلۍ رئیس د حوت په ۳مه ددې رياست د تخنيکي ټيم په شتون کې د معدنونو د استخراج او پروسس په برخه کې د (يون لونګ زيرن) چينايي شرکت له استازي سره وکتل.
د هرات د اوسپنې پټلۍ رئیس ښاغلي مفتي محمد نسيم محمدي د (يون لونګ زيرن) شرکت استازي ښاغلي (ونکسشويه) ته د ښه راغلاست ترڅنګ وويل، اوسمهال په افغانستان په ځانګړي ډول هرات کې د معدنونو د استخراج او پروسس ترڅنګ د اوسپنې پټلۍ په برخه کې چينايي پانګوالو ته د پانګونې لپاره بهترين فرصتونه موجود دي، نو په همدې اساس بايد چينايي پانګوال ددې مهم فرصت څخه په استفادې دلته د اوسپنې پټلۍ په برخه پر پانګونې خپل تمرکز زیات کړي.
د (يون لونګ زيرن) شرکت استازي د افغانستان د اوسپنې پټلۍ ادارې له وروستيو فعالیتونو خوښي وښودله او د اوسپنې پټلۍ پراختيا يې د سيمې او نړۍ سره د افغانستان د نښلولو لپاره اساسي کيلي وګڼله.
هغه زياته کړه، چې په افغانستان کې د اوسپنې پټلۍ په برخه کې پانګونه يې لومړيتوب دی او ياده موضوع به ددې شرکت له رهبرۍ سره هم شريکه کړي.
د يادونې وړ ده، چې د ياد شرکت استازي هرات ولايت ته د فولادو د توليد په برخه کې د ۳ ميليونه امريکايي ډالرو په ارزښت د يوې پروژې د سروې په موخه سفر کړی وو، چې وروسته به د پانګونې دا کچه تر ۱۰۰ ميليونه امريکايي ډالرو پورې لوړوي.
