چین ته د افغانستان د جنغوزیو د صادراتو د تړون د پلي کېدو لپاره د همغږۍ جلسه
د رېل له لارې چین هېواد ته د افغانستان د جنغوزیو د صادراتو د 2.2 میلیارد ډالرو د تړون د پلي کېدو لپاره د آسانتیاوو د همغږۍ جلسه د یکشنبې په ورځ ( سلواغې ۱۳مه) د اړوندو ادارو د استازو په حضور کې ترسره شوه.
په دغه ناسته کې د هېواد د اوسپنې پټلۍ ادارې مرستیال عبدالباري صدیقي، د حیرتان بندر د رېل پټلۍ له لارې د چین بازارونو ته د افغانستان د جنغوزیو د لېږد په اړه د خپلې ادارې له اړخه ډاډ ورکړ او په حیرتان بندر کې یې د آسانتیاوو او امکاناتو د زیاتوالي غوښتنه وکړه.
د چارو ادارې عمومي ریاست تخنیکي مرستیال خان ولي خان بشرمل، د یاد تړون د پلې کېدو په موخه د اړوندو ادارو پر همغږۍ او همکارۍ ټینګار وکړ او ویې ویل، چې چین ته به پسته، بادام، چارمغز او یو شمېر نور توکي هم صادر شي.
د یادونې وړ ده، چې په دې وروستیو کې د 2.2 میلیارد ډالرو په ارزښت چین د ۶۲ زره ټنو جلغوزیو د صادراتو تړون د دواړو هېوادونو د خصوصي سکټور تر منځ لاسلیک شوی دی.
تمه ده، چې چین هېواد ته د دغو جنغوزیو د لېږد بهیر په راتلونکو پنځو کلونو کې د حیرتان بندر او اوسپنې پټلۍ له لارې تر سره شي.
