دیدار معاونین ادارات خط آهن افغانستان و اوزبیکستان

میرویس میرزکوال، معاون مالی و اداری اداره خط آهن جمهوری اسلامی افغانستان که وزیر امور خارجۀ کشور را در بازدیدش از تاشکند همراهی می‌کند، با معاون هیأت مدیرۀ خط آهن اوزبیکستان دیدار نموده و پیرامون تقویت همکاری‌های ترانسپورتی وایجاد سهولت‌های ترانزیتی میان افغانستان و اوزبیکستان، بحث وتبادل نظر کردند.

در این دیدار هردو جانب روی جزییات تخنیکی پلان تطبیقی خط آهن سه‌جانبه اوزبیکستان-افغانستان-پاکستان بحث‌های تخنیکی نمودند.

آقای میرزکوال از آمادگی جمهوری اوزبیکستان به‌خاطر میزبانی از نشست سه‌جانبه برای تصویب نقشۀ راه ساخت خط‌آهن اوزبیکستان-افغانستان-پاکستان ستایش نموده، ابراز امیدواری کرد که کار روی خط ‌آهن مزار-هرات-قندهار-کویته نیز به زودی آغاز شود.