د افغانستان د اوسپنې پټلۍ ادارې او د آذربايجان جمهوريت د اوسپنې پټلۍ د سهامي شرکت ترمنځ د همکاريو د هوکړې لاسليک
د ۱۳۹۷ کال د کب د مياشتې په ۲۳ نېټه د افغانستان د اوسپنې پټلۍ ادارې او د آذربايجان د جمهوريت د اوسپنې پټلۍ د سهامي شرکت (ADY) ترمنځ د اوسپنې د پټلۍ په برخه کې د همکاريو هوکړه د دواړو هېوادونو د ولسمشرانو په حضور کې د باکو په ښار کې لاسليک شوه.
د دې هوکړې اساسي موخه، د اوسپنې د پټلۍ په برخه کې د اړيکو او همکاريو د پراختيا په منظور ګډه ارزونه ده، چې د اوسپنې پټلۍ د سکتور د مديريتي سيستمونو سمبالښت، د اوسپنې پټلۍ د ترانسپورت د سهولتونو پراختيا او پرمختګ، د افغانستان د اوسپنې پټلۍ د زيربنا په رغونه کې د آذربايجان د عامه او خصوصي سکتور د پانګونې جلب او ملاتړ، د تجهیزاتو تدارک، د اوسپنې پټلۍ د کارکوونکو روزنه او د اوسپنۍ پټلۍ د همکاريو د سازمان (OSJD) په مرسته د مالونو د ترانزيټ پراختيا موضوعات شامل دي.
د دې هوکړې لاسليک کولای شي د دواړو هېوادونو د اوسپنۍ پټلۍ په منځ کې د انتقالاتو سطحې او د معياري خدمتونو وړاندې کولو ته پراختيا ورکړي او هم په سيمه کې د اقتصادي ودې او اوسپنې پټلۍ د شبکې په پرمختګ کې اغیزمن او ګټور ثابت شي.
