د نوي کال په مناسبت د افغانستان اوسپني پټلۍ ادارې د رهبري پلاوي مبارکي پیغام!
د ۱۴۰۰ نوی لمریز کال ورسېد او د الهې لامحدوده طبیعت یوځل بیا تازګۍ او ښکلې څېره ځان ته غوره کړه. د افغانستان اوسپني پټلۍ ادارې رهبري پلاوی نوی کال د افغانستان شریف ملت، د افغانستان اسلامي جمهوری مشرتابه، د ملي شورا غړو ته مبارکي وايي.
د لوی خدا ج له دربار څخه غوښتنه لرو چې نوی کال د سولې، آرامۍ او خوشحالۍ ډک کال وي، هېواد له پرمختګ او سوکالۍ سره مل وي او وتوانېږو خپل ګران هېواد د آبادۍ خواته یوسو.
د افغانستان اوسپني پټلۍ اداره خوشحاله ده چې په تېرکال کې د ګڼ شمېر ستونزو او ننګونو سربېره مهمې ملي او سیمه ییزې پروژې پرانیستې چې له امله يې د اوسپني پټلۍ له لارې له سیمه ییزو او نړیوالو هېوادونو سره سوداګریز او ټرانزیټ لارې پرانیستل شوې.
دغه راز ددې ادارې رهبري پلاوی خوشحاله دی هغو هڅو او پروګرامونو ته په پام چې ترسره شوي، د اوسپني پټلۍ سکټور له لارې د لېږلو او ملي عوایدو کچه ډېروالی موندلې او په مستقیم ډول د اقتصادي پرمختګ او سوداګریزې راکړې ورکړې په برخه کې اغېزمن تمام شوي دي.
د اوسپني پټلۍ ادارې رهبري پلاوی او کارکوونکي د افغانستان اسلامي جمهوریت رهبري پلاوی او شریفو خلکو ته ډاډ ورکوي چې د نوی لمریز کال په پیل سره، په جدي ارادې سره د اوسپني پټلۍ د بنسټیزو برخو د پیاوړتیا او د ریلي خدمتونو د ښه والي په برخه کې ډېرې هڅې ترسره کړي.
